Imannayn, timannayin, berkat g inghmisn s tmazight g Barcelona TV.
Ass n ljamâ yan g yulyuz ad izrin. Ittawskar usmciwr f udustur amghribi amaynu. Imghrabiyn d timghrabiyin kfan amnid-nnsn f uhyyu n tugt n tghawsiwin lli f d-yiwi udustur-a, yat gisnt tga-tt askcm n tamazight fad ad ttg tunsibt (s târabt tarsmit). G tamdint n Barsiluna, g tgmmi n tqunsulit n lmaghrib, mnnaw mddn ad nn-igan idarn nns f-ad ad inin yih ngh uhu i udustur-a amaynu. Ad nskºti mas, mk llis tnna tanbadt tamghribit, 70 % n middn ad idran g usmciwr f ddustur, d âlayn 98% nnan yih.
Imalas-ad izrin tawskar yat twada g wammas n tmdint n Barsiluna f unushyu ngr mddn, nghd tamufubit (s tkatalant homofòbia). Yili mayad f lmsibbt n wass amadlan n willi mu ttinin Gay d tilisbayatin. Middn-a ar ttirin ad tn-uqqrn imzdaghn, qqbln-tn s mklli gan, ilin darsn izrfan nnsn zund kullu middn n tmazirt. Mqqard mnnawt tmizar sissnt g Urupa s irgazn Gay d timgharin tilizbayatin, llan willi sul ttininin mas middn-a ur zggin, d kra n tmadunt n ixf ad ddarsn illan. Mayad af skrn tawada-ya, irin ad badln amnid ad n tuggt n middn.
Tnna tnbadt n Spanya g tmdint n Barsiluna mas tra ad tsffgh inmudda ihbbasn lli ur darsn tiwriqin. Mayad iga yan uslgn (lqanun s târabt), iffagh-d asggas-ad izrin 2010. Ndadand, sffaghn 123 n uhbbas war tiwriqin, ar ttinin masd mayad idrus igh nzra 1136 n uhbbas n imudda n brra bla tiwriqin g tsiggiwin idfarn i Barsiluna, 45% n ihbbasn akw.
Ar ttinin wilin walanin, mas ur yaggug ad sffghn kigan n ihbbasn g usggas-ad llig nlla, 2011.
G tsga n tassast tadamsant, yan mnaw ussan ay-ad, tmla Generalitat menck n idrimn rad tzli i tghultt n tdelsa (s târabt: thaqafa). Iga lhal 302 n umlyun n uru. 12% chan f idrimn n isggasn ad zrinin. Ferran Mascarell, ansfaw n tdlsa takatalnt n Generalitat, inna mas ira ad issizwir tiwuriwin lli zdarnin ad awsnt g usnflul awsnt awd g usissn n tkatalant g tmizar n umadal. Tidrusi n idrimn i tdelsa, rad aggºnt tmitar-nns g imussutn d twwuriwin, ura awd g tuzunin d lidarat lli idfarn i Departament de Cultura.
Igmamn n Usqqammu n Umzagh (ddifaâ s târabt) n Tsdawit Taâumumit kfan snat txsayin, Yih, tixsayin, i tasikritirt n Tsdawiyin n urzzu (s tkatalant Universitats i Recerca). Ran ad mln s mkad is urrin akks n idrimn i tghri d usslmd g tsdawit takatalant. Imsslmdn d imzrawn d middn xddmnin g tsdawit lsan tilmikkatin n ifradn, awin tarzzift ad n txsayin, fad ad mln mas ur ran ad asn-krin tighrad-nnsn, d ad ur sallin i watig n tghri g tsdawit.
Kmmln inghmisn s tmazight, tanmmirt, ar tayad!
